Borges kihkuiloua sen tlahtoli itoka Los milagros secretos noso El milagro secreto, amo kuahli nikelnamiki.

Ipan yajon tlaijkuilol, kitohtoma se tlahtoltsintli kampa sen tlakatl kichia matlanezi pampa kitoponiskeh. ¿Tlikine ijkon kimiktiske? Yonikelkah. Yajon amo matets yohlana. San matmaxtiakan ika ipan jion tlaltipaktli notelolo.

Kuak uatlanesi, soksike tlakame Kon temoua kampa kaltsauktok. Kuak peua nehnemi jin tlakatsintli yekimastika xok aka uelis kipaleuis, niman peua no ueyikatsatsilia.

Ikamilak ika nochi i yohlo no ueyikatsatsilia, niman se totehkotsi kikakilia y neihman. Amo kitlahtlania tomin, noso amo makimiktikan. Yejua yekimastika ika yajon tlamantli amo uelis nochiuas. San kitlahtlania makikauilikan makitlamilti sen i ijkuilol.

Niman jion tekohtsi kipaleuia cuak uan kinakastilia oksekime tlakameh yo teihjle matlatoponikan. Tecoh no ekimastika amo uelis kiteltis tonaltsintli, nin amo uelis kiminteltis tetepostsitsintin.

Uan kichiua, ipan itsontekon tlakatsintli noche kitelcha. Itikompa panoua sen xiuitl. Ipan jion xiuitl tlakatsintli ueli kihkuiloua i amox. Kuak kitlamiltia, kaxilia tetepostsitsintin niman onuetsi ipan tlahli, kuahli miktok.

Maski nejua amo nikneltoka tla nemi tetekohtsintin kema nikneltoka ika kamiantika itla uan ikamilak tikneki mapano, panoua maske santotikopa. Ipan totsontekon noso ipan toyohlo.

Maka matlanokuamalina: amo niktosneki itla uan tajuame tikyolicha.

Ache maniktohtoma nonemilis.

Kampa nichanchiuaya onikixmat sen siuatsintli ikamilak kualtsi, ikamilak onikuelitak. Pampa ikamilak ni pinauistetl, xkaman onikjle tlanikuelitaya. Aman yekipiyas Sen xiuitl ika nichanti Chiapas, mero nisitsi Tabasco. Naniktoia kuahli yo kalak ipan notsontekon ika xokitla uelis iuan nikchiuas jion siuatsintli.

Aman yaloua oniktemik iuan yajua niisa, sansekan tikisa ipan ohtle, niman nochipan titomayantoue. Tikimintlapaloua in ikniuan, in chouan, in kuachtin, niman ixkaman nets makaua.

Kampa oniktemik, ohnmat saken nehli uan ipan notsontekon nikistok.

Jion temikilis nejua kuahle niktos no Milagro secreto.

Aman nochi se tonahle ikamilak nipaktok. Amo nitsitsikuintinemi. San nipaktok, ikamilak nipaktok. San ika ni paki onikjieko nikijkuilo ika no nantlahtol.

 

2022/04/13